شعر محلی مازندرانی به مناسبت هفته حمایت ازبیماران کلیوی، تقدیم به محضر این عزیزان

تِره اِفتاب و وارِش اِشناسِنّه

تِره چپون و گالِش اِشناسِنّه

تِره وا و لله وا اِشناسِنّه

تِره طالب و نجما اِشناسِنّه

تِره بِهار و پَعییز اِشناسِنّه

تِه تَنِّ با دیالیز اِشناسِنّه

تی غِرصه کوهه اِندا هَسّه دومِبه

تی دِل خِشی تا کِندا هَسّه دومبِه

تِه خوانی اِفتابِ سایه بَواشی

تِه خوانی ماهِ هِمسایه بَواشی

تِه خوانی دِلِ اَرمونِّ بَوینی

لیلی بَوّی شه مجنونِّ بَوینی

ته خوانی خواره تن داری همیشه

هامِج هامِج هاکِنی بوری ویشه

ته نِخوانی زِوونِّ لال بَوینی

دیمِّ زرد و دِل له مِردال بَوینی

تی دل پاک هَسّه بی کینوئه دومبه

زِلالِ سونه آئینوئه دومبه

اونتا خوانه که تِره لو بَزِنه

تِره بَوینه خِدره خو بَزِنه

گِمون کِمبه بی عار هَسّه ندونده

طالبِ خوردِ مار هَسّه ندونده

نَدونده غم چِه چیه درد چِه چیه

بِرمه بَکِنه اَتّا مرد  چِه چیه

نَدوندِه اِسّا چه تی چینه کِنده

خون خِنّه تا شه دردِ پینه کِنده

نَدونده تِه خَله صَبوری کِندی

دردِ قِرد دِنی بیستا موری کِندی

نِخوانی که ته اَصری جِر دَکِفه

اتا دیگه تِه وِسّه کِر دَکِفه

نِخوانی که مه دونه ایزی دَوّه

نِخوانی دیگه دیالیزی دَوّه

خوانی آسٌِمونّه آبی بَوینی

اِسّاره شویِ مهتابی بَوینی

الهی که بی درد و غم دَواشی

مه زخمِ سینه ره مرهم بَواشی

الهی که دیگه مریض نَواشی

خواره تن داری دیالیز نَواشی

شاعر : هادی اکبری وسطی کلایی